چھج چہ پا کےچھنڈ تے نئیں

چھج چہ پا کےچھنڈ تے نئیں
ساڈیاں کنیاں ونڈ تے نئیں

کَوڑے گھُٹ نیں ساہواں دے
ایہہ کوئی گھیو تے کھـَنڈ تے نئیں

بہندا اٹھدا سوچ رہیاں
تیرے ولے کنڈ تے نئیں

پیراں تھلے آ گئے آں
اَڈِّیاں تھّلے منڈ تے نئیں

کیوں نئیں میری اکھ لگدی
ایہہ مرزے دا جنڈ تے نئیں

تیرے اندر میل تے نئیں
میرے اندر گنڈھ تے نئیں

تُوں ساہواں توں ہولا ایں
سر تے چائی پنڈ تے نئیں

کدرے دھپ تے کدرے چھاں
بدلا ! کانی ونڈ تے نئیں