اک خاص سہیلڑی سوہنی دی
محرم راز سی نال وفا واری
سن کے گلّ کتوں آئی دوڑ اوویں
لئی سوہنی پاس بلا واری
آکھے گلّ تیری ظاہر ہو گئی
کہڑی گلّ دا کریں لکا واری
سوہنی آکھیا دسّ علاج کوئی
توں ہیں عقل دے وچ دانا واری
جیکر ماں تے باپ نوں خبر ہوسی
دیسن مجھّ نوں مار مکا واری
مہینوال نوں چا جواب دیسن
تاں بھی مر ویساں زہر کھا واری
آکھ سوہنیئیں ! عشقَ مثال آتش
ککھیں بھاہ نہ کرے چھپا واری
دوجی گلّ مشہور ہو گئی تیری
ایتھے عقل سندی نہیں جا واری
جیکر ربّ سجن دوتی جگّ سارا
کجھ خوف نہ جیؤ تے لیا واری
جنہاں دکھ ڈٹھے تنھاں سکھ پائے
دکھوں سکھ دندا ربّ چا واری
تنگی بعد فرحت، فرحت بعد تنگی
دتا آپ خداء فرما واری
ثابت رکھ یقین متین کرکے
مکھ یار توں نہ بھوا واری
دلوں ڈول نہ مول میں گھول گھتی
نال صبر دے کم روا واری
جس دا نام غفور رحیم سائیں
لیسی فضل توں آس پگا واری
