حمد نعت خدا رسول دی تھیں
جیہدی صفت دا انت شمار ناہیں
طعنے طرف سوہنی مہینوال لکھے
تیرا سوہنیئے کجھ اعتبار ناہیں
انی وہوٹیئے، منس دیئے پیاریئے نی !
سچا تدھ دا قول قرار ناہیں
تینوں لکھ کروڑ مبارکاں نی
خوشی عیش ولوں ملے وار ناہیں
گوڑہا پیار ہویا خاوند نال تیرا
ایسا ہور کتے گوڑہا پیار ناہیں
بھلا ہویا تساڈڑی آس پُنّی
کوئی تدھ جیہا ایشدار ناہیں
متاں خوشی تھیں ہو خوش مرگ جائے
خانا خصم دا مفت اجاڑ ناہیں
کوئی تدھ جہی کِتے جگّ اتے
گھر سہرے وچ سردار ناہیں
ڈولی چڑھدیاں مول نہ ڈولِیؤں توں
ہوئیوں اساں ولوں شرمسار ناہیں
تسیں سہرے ہو مغرور بیٹھے
کوئی اساں جیہا ہور خوار ناہیں
ایہہ تاں جوبنا ٹھگّ بازار دا ای
مان متیئے روپ شنگار ناہیں
لئی دید خرید، ایمان دتا
جھوٹھا عاشقاں ونج وپار ناہیں
شالہ مرے جہڑا تیری سیج مانے
کویں ورتسی قہر قہار ناہیں
پیوے آب حیات رقیب میرا
شالہ صبر پوے اکے وار ناہیں
میری لکھ فریاد دی داد ملسی
بسّ ہور مینوں مار خار ناہیں
گل جھوٹھیاں طوق زنجیر پوسن
ڈھوئی ملسیا اس دربار ناہیں
ناہیں کم اصیل دا نسّ جانا
بازی عشقَ دی ہار لاچار ناہیں
جھوٹھے قول اقرار کیوں کیتیؤ نیں
گھروں کڈھ مڑ کے لئیو سار ناہیں
"انّ قید کن" کیہا ربّ سچے
تساں جیڈ کوئی ہور مکار ناہیں
مڑ کے ہوش سنبھال توں پیاریئے نیں
کیتے قول اقرار وسار ناہیں
جلی ہوئی پتنگ جے جالیو ای
ایپر سوکھتاں لائکے مار ناہیں
تیرا نام لیندا پھراں وچ گلیاں
باجھ رون مینوں ہور کار ناہیں
روک جان میں وانگ پتنگ دتی
کیتا تدھ دے نال ادھار ناہیں
دامن لگیاں دی لجّ پالنی سی
ہتھیں ڈوبیو ای لائیو پار ناہیں
دکھ پیش پا کے آپ نسّ گئیؤں
کوئی میں جیہا اؤگنہار ناہیں
سخی سوئی جو ترنت جواب دیوے
سخی کسے تائیں لاون لار ناہیں
اگے رجّ رہے تیرے پیار کولوں
بسّ یار او مار دبار ناہیں
چار روز دا حسن پراہنا ای
کوڑے حسن اتے پاویں بھار ناہیں
سدا رنگ محلّ نہ ماڑیاں نی
سدا حسن دا گرم بازار ناہیں
سدا دکھ تے سدا نہ ہون موجاں
سدا بلبلاں باغ بہار ناہیں
بھل یار تیرے نال پیار پایا
نہ سی خبر جو یار غمخوار ناہیں
منوں ہار جے کیتیؤ نانہہ میری
ایپر صدق رکھیں منوں ہار ناہیں
تیرے واسطے وچ پردیس رلیا
اوگنہار دا شہر دیار ناہیں
نہیں مہیں چرائیاں تدھ کارن
چھڈے باپ مائی پیارے یار ناہیں
دکھاں گھیریا میں کہڑی ولّ جاواں
نیڑے مجھ دا بلخ بخار ناہیں
چنگی کیتی آ پیاریا سجناں او
سجن ماردے کھچّ تلوار ناہیں
سکّ فضل دی ورتیا قہر بھارا
تیتھوں ظالمے سچ نتار ناہیں
