اول حمد ہزار خدا تائیں
جیندی صفت دا انت نہ کا جانی
لکھ وار درود رسول تائیں
جس دی شان "لولاک" کلمہ جانی
اس تھیں بعد کروڑ سلام پچھے
سنیں حالَ توں جا بجا جانی
جس روز مائی باپ تدھ تائیں
مہیں چارنوں دین ہٹا جانی
ایویں واویلا پئی کوکدی ساں
'میتھے آ جانی ! میتھے آ جانی'
بناں موت آئی کوئی مرے ناہیں
بیٹھی کھان تے پین چکا جانی
مہینوال میرا وال وال کوکے
سنجی ماں نوں رہیاں کرلا جانی
اوڑک مجھ منگائے ویاہیو نے
زورو زور دتی ڈولی پا جانی
گانا توڑ کے سٹیا وچ ویہڑے
دتے کپڑے خاک رلا جانی
جیکر خبر ہندی ایہناں بنھ دینی
مردی کھائی کے کجھ بلا جانی
ایپر ایہہ شرمندگی لکھی آہی
تدھ یار ولوں میرے بھا جانی
گھر ساہرے مول نہ گلّ کیتی
سنجی سسّ بھی رہی بلا جانی
میرے پاس رقیب سوآلیو نے
سنجی پلنگھ تے سیج وچھا جانی
لگا دست دراز رقیب کرنے
ہمت ربّ دتی مینوں چا جانی
ساری عمر میرے ہتھ یاد کرسی
دتی مار کے ہوش بھلا جانی
مہینوال دی رکھ امان ربا
منگی دعا میں ہتھ اٹھا جانی
میری عرش عظیم تے کوک پہنچی
پئی ترنت قبول دعا جانی
اوویں ربّ دے کرم تے فضل کولوں
ستا مجھ توں ہو جدا جانی
سویں نت نویکلا مجھ کولوں
کدی نانہہ ویکھے اکھیں چا جانی
گھر سہرے خاص انجوڑ میری
دتی پیکیاں منوں بھلا جانی
ساعت سال مینوں اکھیں نیند ناہیں
ککر قہر دی رین وہا جانی
بیٹھی یاد کراں میرے سائیاں او
تیرا چا جانی تیرا چا جانی
تجھ باجھ پلنگھ، پلنگھ دسے
سیج سیخ تے جان چڑھا جانی
حیاں مانگ شیہاں کڑک پین مینوں
اک پلک نہ ملے ٹکا جانی
داون کھاون آوندی مجھ تائی
جویں ڈنگ مارے ایدہا جانی
پاوے ویکھنے تھیں دھاوے سول مینوں
آوے دکھ پاوے، گھبرا جانی
لیف صیف مارے جیکر لواں اتے
دکھ سول والا دیوے تا جانی
جو کجھ حالَ میرا میرے سائیاں او
دتا تدھ نوں سبھ سنا جانی
بلدی اگّ تے تیل پلٹیو ای
دتو بھڑکدی نوں بھڑکا جانی
طعنے لکھیو نی آتش وانگ تتے
گئے جگر تے جان جلا جانی
لاواں بھاہ نخسمڑے خصم تائیں
جاتا صدق تھیں اک خدا جانی
آپے ویکھسیں کفل صندوق جوڑے
بلدی تیل نہ پاء مچا جانی
طاقت نانہہ جو جھوٹھ نوں جھوٹھ آکھاں
جو کجھ لکھیا نال ذرا جانی
اس قول اپر پہرہ دیوساں گی
مراں، کراں جے پھیر پھرا جانی
جیکر تدھ تھیں پیاریا مکھ موڑاں
شالہ دوزخیں ملے سزا جانی
شاہد ربّ میرا، توہیں خاص کعبہ
سجدہ ہور نہ کتے روا جانی
لئیاں نال تیرے لاواں پیاریا او
روز ازل دے عقد پڑھا جانی
دامن لگیاں دی رکھیں شرم سائیاں
دماں باجھ میں رہی وکا جانی
میں تے گولیاں دی پڑگولڑی ہاں
نال صدق یقین صفا جانی
اوہو نال ایمان امان تیری
رکھی غیر تھیں بہت چھپا جانی
کدی آبِ حیات وصال والا
اساں پیاسیاں نوں آ پلا جانی
کسے نال بہانڑے آ ایتھے
کویں پیاریا مکھ دکھا جانی
دوتی کوئی پچھان نہ مول سکے
کوئی آونا بھیس وٹا جانی
اؤگنہار بیمار لاچار پئی آں
تیرا دیکھنا اصل دوا جانی
نام ربّ دے ملیں پیاریا او
موئی پئی نوں پھیر جوا جانی
کرساں ہور صلاحَ میں نال تیرے
جدوں آوسیں گا میرے دا جانی
مڑ کے سوہنی دا خط یار ولے
لے کے گیا شتاب سدھا جانی
فضل یار والا خط یار تائیں
دتا اوس نے پھیر پچا جانی
