خط یار والا مہینوال پڑھ کے
چمّ نال کلیجڑے لاوندا جے
لکھیا یار آہا، مل جاہ یارا
یار یار کارن چتّ چانہودا جے
کوئی بنے نہ ڈھو ملاپ والا
اوڑک رو کے نیر وہاوندا جے
کہڑے طور ملساں پیارے یار تائیں
لکھ فکر دلیل دڑاوندا جے
گیا عشقَ سکھا گدا ہونا
اوڑک وقت ایہہ عشقَ سکھاوندا جے
پہلوں چاک ہویا ہن خاک ملی
کارن یار دے بھیس وٹاوندا جے
ظالم عشقَ نے پیر فقیر کیتے
تختوں شاہ بھی چا گراوندا جے
گھر گھر پھرے بہانڑے نال منگدا
کارن یار دے سگن مناوندا جے
کوئی دے گالی کوئی برا بولے
کوئی مہر سیتی خیر پاوندا جے
اول کل مصیبتاں جھلّ لیندا
بھار عشقَ والا جہڑا چاوندا جے
اک خیر محبوب دی چاہ آہی
ہوئی خیر بدخیر دھراوندا جے
گلی جان والا گلی وچ کوچے
پھرے کونج وانگوں کرلاوندا جے
اوڑک جھاگ کوچے دکھ درد والے
گھر سہرے یار دے جاوندا جے
خیر آن فقیر نوں دان کیجے
اچی نال آواز بلاوندا جے
کنیں یار دی سنے آواز سوہنی
ایپر وچ پچھان نہ آوندا جے
کہیا سسّ، فقیر نوں خیر پاویں
سانوں آسرا فقر دے نام دا جے
سوہنی خیر فقیر نوں پاؤن چلی
دیکھو وچھڑے ربّ ملاوندا جے
اوہلے ہو کہیا ایہہ لے خیر سائیں
مہینوال رومال نوں ڈاہوندا جے
خیر لیندیاں سار نثار ہویا
سارا ہوش حواس بھلاوندا جے
سوہنی خاص مثال مثال آہی
عاشق وانگ پتنگ جلاوندا جے
کیتی ڈھونڈ سوہنی مہینوال بھاویں
جہڑا دیکھ مینوں غش کھاوندا جے
اوڑک لیا پچھان تے جھسّ تلیاں
یار یار نوں ترنت اٹھاوندا جے
گل لگ ملی بجھی اگّ دل دی
ایپر خوف رقیب دی ماؤں دا جے
لگی حالَ دسن چھیتی نال سوہنی
مہینوال وی رو سناوندا جے
کسے نانہہ سنی اک دوسرے دی
اوڑک کہے سوہنی من بھاوندا جے
جاہ صدق یقین تھیں بیٹھ سائیاں
ایپر پاس جو گھاٹ جھناؤں دا جے
دیسی ربّ مراد پگا تیری
جہڑا کل دی آس پجاوندا جے
فضل شاہ محبوب دی چاہ اندر
ساعت سال مثال لنگھاوندا جے
