اک رات چلی سوہنی یار ولے
سوہنا ہار شنگار لگا بیلی
ستی پئی ننان نوں جاگ آئی
اوہ بھی مگر چلی کر دھا بیلی
سوہنی نکل دروازیوں رواں ہوئی
دھریا منہ جھناؤں دے دا بیلی
کھوج چور سندا کھوجی پکڑ لیا
ایپر چور نوں خبر نہ کا بیلی
گھڑا چا لیندی اوہناں بوٹیاں تھیں
جتھے آوندی نت لکا بیلی
سر تے بنھ واحل ربّ یاد کرکے
سوہنی ٹھلھ پئی دریا بیلی
مل کے یار نوں لنگھ ارار آوے
رکھے گھڑے نوں پھیر چھپا بیلی
اوہلے بیٹھ ننان نے سبھ ڈٹھا
ایپر اٹھ گئی غصہ کھا بیلی
اگوں سوہنی وی گھریں جا ستی
الفوں یہ تیکر گل پا بیلی
جدوں فظر ہوئی اوہ بھی قہر بھری
گئی طرف دوکان سدھا بیلی
پھیر طرف جھناؤں دی رواں ہوئی
کچا گھڑا دوکان تھیں چا بیلی
جتھے سوہنی گھڑا ٹکایا سی
جا پہنچی اوسے ہی جا بیلی
کچا بوٹیاں وچ لکا رکھے
پکے گھڑے دے نال وٹا بیلی
کچی کچّ کیتا دھروں سچ آہا
کہڑا لکھیا لیکھ مٹا بیلی
گھریں آئِ پہنچی خونن عاشقاں دی
دیوے ماں نوں بات سنا بیلی
اس دی ماؤں بھی مارنا لوڑدی سی
دتی آس خدا پجا بیلی
آئی قہر تے غضب دی رات مڑکے
کالا ماتمی ویس وٹا بیلی
ادھی رات ٹری سوہنی یار ولے
گئی پیر فقیر منا بیلی
اک رات نھیری، وگے وا دوجی
پٹّ سٹدی رکھ اٹھا بیلی
بجلی بدلاں تھیں کڑک مار پیندی
دیندی طبق زمین ہلا بیلی
اجل پئی پکاردی سوہنی نوں
میتھے آ بیلی، میتھے آ بیلی
جیوں جیوں سوہنی نوں سدّ پین یارو
تؤں تؤں آنودی پیر اٹھا بیلی
دیؤ وانگ اس جنڈ کریر دسن
دین رتّ سریر سکا بیلی
غل چار چپھیرے آواز کردے
ہور لکھ کروڑ بلا بیلی
اس رات ہزار آفات آئی
کھولھ منہ بیٹھے ایدہا بیلی
پیریں چبھن سولاں، سولاں والڑی نوں
آہی جاہ نہ خیر دھرا بیلی
اوڑک جھاگ مصیبتاں جاء پہنچی
جتھے آنودی گھڑا ٹکا بیلی
اوہناں بوٹیاں تھیں گھڑا چاء لیندی
کرکے یاد رسول خدا بیلی
گھڑا پکڑنے تھیں کچا نظر آیا
رو رو کوکدی گھتّ کہا بیلی
ایویں پئی پکاردی ربّ اگے
جویں صاحباں تدھ رضا بیلی
میرا پکیوں کیتا ای چا کچا
کہڑا دے تقدیر مٹا بیلی
جیکر آپ رکھیں مارے کون سائیاں
موئی ہوئی نوں دیئں جیا بیلی
کئی لکھ انتاروآں ڈبدیاں نوں
دیویں فضل تھیں پار لنگھا بیلی
جیکر مڑاں تاں عشقَ نوں لاج لگدی
مڑن اشکاں نہیں روا بیلی ۔
رات یار والی اج مجھ اتے،
مڑیا دین ایمان تھیں جا بیلی ۔
جیکر پچھاں جاواں جھوٹھی یار ولوں،
پچھاں جان دے وچ خطا بیلی
جیکر سنگ رکھی کیکر سنگ ملساں
سنگ والڑے سنگ گوا بیلی
پچھاں مڑن کیہا جیکر پیر موڑاں
جلاں دوزخیں ملے سزا بیلی
سوہنی تاں ہوواں جیکر اج ملساں
نہیں کوجھڑی نام دھرا بیلی
میتھوں کویں نہ مول قضاع ہوسی
جو کجھ آئی آں لیکھ لکھا بیلی
جیکر پچھانہ مڑاں کافر ہوئی مراں
دوزخ کل کفار دی جا بیلی
مہینوال تائیں کعبہ جانیا میں
کہڑا کابیوں مکھ بھوا بیلی
سچا عشقَ تاہیں جیکر اج ملساں
دیاں جان نوں گھول گھما بیلی
اکے یار دا جا دیدار کیتا
اکے جان ہو گئی فدا بیلی
باجھ یار دلدار غبار دسے
مہینوال دا ہے مینوں چا بیلی
گھڑا پکڑ کے ہو روان ٹری
نال صدق یقین صفحہ بیلی
اک یار دا پیار درکار جاتا
چلی غیر دی پریت چکا بیلی
سوہنی جائ پہنچی اپر کنڈھڑے دے
مونہوں منگدی کھڑی دعا بیلی
سر تے بنھ واحل کلمہ یاد کیتا
ٹری یار دا لین لقا بیلی
فضل جان کے جان وننجان عاشق
مڑدے عشقَ نوں لاج نہ لا بیلی
