نواں سال تے میں

جند دے بنیرے اُتوں
ورھا اک لتھیا
اک ورہا چڑھیا
جان والا جان ویلے
آندے نال لڑیا
کورا بھری ٹہنیاں تے
انج چپ سیت اے
جیویں اک دوجے کولوں
رُس جاوے میت اے
رات دے ہنھیریاں تے
قہر والا ویلا اے
اک نوں اے جلدی
دوجے لئی کویلا اے
دُھند بھری سڑکاں تے
سلھا سلھا شور اے
ہاسے وی نیں مونہاں اُتے
دل وچ چور اے
سلھی سلھی چُپ وی
ٹکور کرے آس دی
پالے وچ پھجی ہوئی
گل کرے پیاس دی
دور کوئی کلا کِسے
دُھند دے انبار وچ
لفظاں دے نال نال
سوچ دی قطار وچ
ورھے نال چڑھ کے
ورھے دے بنیرے تے
دُھند چ لھویٹی ہوئی
رات دے ہنھیرے تے
چڑھ کے بنیرے اُتے
تکے ہر پاسے انج
دُکھ وچ ڈھکی دِسے
جیویں ہر پاسے جنج
کھلی ہوئی اکھیاں دے
دسے کوئی خواب کیہ
ورھے دا حساب کیہ
سوال کیہ جواب کیہ