اوہ حیران ہوئے ایہہ سُن کے
جین دی وی کوئی چس ہوندی اے
پاگل من دی اِچھیا٭ دا وی حل ہوندا اے
رات دی انّھی رُشنائی سی
جِیو جی وڈیائی سی
میں اپنی ہی لور٭ اِچ ڈولدا ڈھلیا تے
بڈھڑے ہتھ سہارا منگیا
نین نشیلے مار کٹاری لنگھ گئے
میرے یار دُکھی نے اپنا آپ دھُرو٭ کے
میرے موڈھے توں سِر چک کے
پَیر زمین تے دھریا
گھر دا بوہا پھڑیا
مینوں لگیا میں ایس شہر کدیں نہیں آیا
—-
* اِچھیا: اِچھا توں۔ خواہش۔
* لور: موج وچ، ترنگ وچ
* دھرُوہ: کِھچنا، کِھچ کے لے جانا
حوالہ: دُوجا ہتھ سوالی؛ صفحہ 35 ( ویکھو )
