مناظرہ عقل و نفس

عقل شاہزادِے نُوں پِھر وِرجے، مت تیری کیوں ماری
ساس اُڈّن تک آس نہ توڑن ،خاص جِنہاں دِی یاری

نفس کہے میں کاہلا ہویا، کچرک توڑِی جرساں
لکھ مُصیبت جھاگ نہ مِلیا، اج ملِے بِن مرساں

عقل کہے کیوں کملا ہویوں، عِشقے لج نہ لائیں
اِتنی سختی اگّے جھلّی آ،کوئی دِن ہور لنگھائیں

نفس کہے ہُن کِتّھوں مِلسی، نہ کوئی دس سُنیہا
آس ہوندی دس پؤندی جِس دِی ،اینویں جرن کویہا

عقل کہے ایہہ کم عاشق دا، عِشقوں بس نہ کرنی
لاکے بازِی بے اندازِی ،اوڑک وار نہ ہرنی

نفس کہے ایہہ ہارن کیہا ،میں مُڑ مِصر نہ چلیا
راہ سجن دِے اندر مرکے، بہتر خاکوں رلیا

عقل کہے کھا کاتی مرنا، کم ہوندا شیطانی
بھار لگّاتاں پنڈ اُتاری ،نئیں عِشق دِی بانی

نفس کہے فرہادے لایا، آپ سِرے نُوں تیشہ
اوہ مویا مردُود نہ ہویا، میں بھی اوہ اندیشہ

عقل کہے فرہادے سُنیا ،شیریں گئی جہانوں
اوس جہان گیا سی ڈُھونڈن، مویا نئیں اَک جانوں

نفس کہے کیوں مہینوالے، ماری چھال چنھاوِیں
مارُو کانگ ڈِٹّھی سی سوہنی، کیوں پئی دریاوِیں

عقل کہے تُوں سمجھیں ناہیں، اوہ مرنا کِت پاسے
دوئے ہک دُوئے ول ٹِھلّے ،گل مِلن دِی آسے

جے ایہہ مرنا جائز ہوندا، تاں مجنُوں کیؤں روندا
ترِیہہ ورھے کیؤں سڑدا رہندا، مر سؤکھا ہو سؤندا

جِس دِن ہِیر وِیاہی کھیڑے، رانجھا بھی مرجاندا
کاہنُوں کن پڑاندا ٹِلّے، گل کیؤں کفنِی پاندا

ویکھ زُلیخا کِتنی واری، دُکھّاں پئی اکائی
مؤہرا کھا نہ موئی تاہیں، ہر عاشق دِی مائی

ہور ہزاراں عاشق ہوئے، دُکھیے تے لاچاری
یار ملِے بِن دردوں اَک کے، پیٹ چُھری کِس ماری؟

مرداں والا دائیا کرکھاں، رکھ پِچھلی جو عادت
وانگ سسّی جے تسّا مویوں ،تاں بھی عین شہادت

نفس عقل دِی تابع ہوندا، جو کہندا سو مندا
لُگّے پِنڈ مُقدّم موچی، ساڈے اُتّے بندا

جے کر شرح کراں اِس گل دِی، دُور سُخن ٹُرجاندا
کرکے صبر مُحمّدبخشا، قِصّہ چل سُناندا

نفس عقل دا جھگڑا ترُٹّا، عشقے رٹ مُکائی
سیف ملُوکے مُنصف بن کے، فال اُتّے گل پائی

کہندا ربّا جے تُوں مینُوں، دِلبر نال مِلاسیں
تاں اِس وقت کِسے دِے ہتّھوں، پانی سرد پِلاسیں

جے اِک گھڑی نہ پانی لدّھا، ظالم لُوء قہر دِی
ساڑ ہلاک کرے گی مینُوں، چاہ رہسی دِلبردِی