میں دھرتی دی گودی بیٹھا
اُڈاں وچ اسمان
میرے وچ زمانے سارے
میرے سبھ جہان
میرے رنگ نیں وکھرے وکھرے
میرے رُوپ ہزار
میں بے مول حقیقت ہو کے
وکاں وچ بزار
میرے وچ شیطان وی لبھے
میرے وچ بھگوان
دھرتی دی میں گودی بیٹھا
میں پرچارک امن صلح دا
میں جنگ دا سامان
میں بربادی میں آبادی
میں ہاں ہر فرمان
میرے وچ انسان وی زندہ
میرے وچ حیوان
دھرتی دی میں گودی بیٹھا
میں ایہہ کھیڈ رچائی ساری
میں ہر گل دا مُڈھ
میرے کارن دنیا وسے
میں جگ دی سُدھ بُدھ
میرے وچ کفر وی پلدا
میرے وچ ایمان
دھرتی دی میں گودی بیٹھا
(2005، لندن، انگلینڈ)
حوالہ: گھونگھٹ تاکے؛ صفحہ 66 ( ویکھو )
