وراثت

ماں نے چُپ دی گڑھتی دے کے
میرے بُلھ ای سی دتّے
پر خورے کیوں
کناں نوں بند کرنا بھل گئی
اکھ کھلی تے چار چفیرے
شکلاں دسیاں
جیہناں نوں کجھ پُچھ نہ سکی
ویہندی رہی تے سن دی رہی
میں شکلاں نوں سن دی رہی تے
آوازاں نوں ویہندی رہی
بُلھ سیتے سی ہور کیہ ہوندا
کھلیاں اکھاں
کھلے سفنے ویکھن لگیاں
تاں رسماں دی پٹی آ گئی
اکھاں اتے گھٹ کے بجھی
رتی پٹی
جیہدی گنڈھ میں کھول نہ سکی
پوٹے ہنبھ گئے
نونہہ وی جھڑ گئے
پر نہ کھلی ایہ رسماں دی رتی پٹی
ہُن میں اپنے ٹُٹے خاب تے زخمی سوچاں
اپنی دھی نوں کسراں سونپاں؟