رُتوں رُتیں ونڈیندیاں سانولاں ، پیلکاں، لالِیاں
مُکھڑیو مُکھڑے سجدیاں ! جُھمکیاں نتھنِیاں والِیاں
ہِکنڑ نِکرتاں ڈوبِیاں ، سوہنڑیاں نخریاں ساڑِیاں
ہِکنڑے کرتاں تارِیاں ! کوہجِیاں ،کملِیاں ،کالِیاں
اوکنڑاں سوکنڑاں جر دیاں ، جا بنیرے اپڑِیاں
بَھلیے جِنہاں انگورِیاں ، دُھپّاں دُھوڑاں جالِیاں
لگدیاں دی لٙج پالنڑاں ، کوئی بالاں دی کھیڈ نئیں
یارِیاں توڑ نبھانڑیاں ، کِتھے ایڈ سُکھالِیاں
چیتر چاہ چڑھاوندیوں ، قِصے کہانڑیاں پاوندیوں
دِل نگری وچ آوندیاں ، یاداں بن بن پالیاں
مِنتاں زاریاں ساہج کے اوہنوں کدے مناون دا
اساں چَج نہ سِکھیا ، اُنج پئیاں عُمراں گالِیاں
بھانڈا کوئی لے آوندیوں، پور کے سب لے جاوندیوں
ایہہ کے چا لے آوندایں، ٹُھوٹھے ، تھال ، پیالِیاں
پکنڑ دی رُت آئی تے جِنہاں واہِیاں بیجِیاں
مُڑ تیارِیاں ساہِجیاں ، فصلاں آنڑ سمھالِیاں
ہِک پکھنڑوں سی راکھواں ، اساں سی پال کے رکھیا
بُنڑ لئے جال شکارِیاں ، سو سو چالاں چالِیاں
عابد مِلن فقیریاں ، لوڑنے سُکھ سَواد وی
رہنڑاں وی منگوال تے بہنڑاں وی کٹھیالیاں
رُتوں رُتیں ونڈیندیاں سانولاں ، پیلکاں، لالِیاں
حوالہ: گئے گواچے سُکھ