جیہدے پاروں جگّ تے ساڈا، بخت اُچیرا ہونا سی
واہ تقدیرے! توں وی ساتھوں اوہ ہی بندا کھوہنا سی
شکلوں وی اوہ گھٹّ تے نہیں سی، سورج، چنّ، ستاریاں توں
سوچاں، عملاں پاروں وی اوہ سوہناں تے من موہنا سی
انصافاں دے ناں تے اَنّیاں، جیہڑا چنّ چڑھایا اے
دسو بے انصافی وچ وی، ایس توں ودھّ کی ہونا سی
جیون دا ولّ دسِّئے مینوں، اوس جی دار دے جیون نیں
اوکھے ویلے دا ہر پتھر، جیہدے لئی کھڈونا سی
ساڈی تھوڑ دلی دا وی اے، حصہ اوہدے وڈھن وچ
جیہڑے رُکھّ نے عاطف سانوں دُھپوں بہت لکونا سی
