ویہڑے دا رُکھّ کُھوہ دیاں ٹنڈاں، سیج دی چدر رُنّی

ویہڑے دا رُکھّ کُھوہ دیاں ٹنڈاں، سیج دی چدر رُنّی
اوہدے مگروں گھر دی ہر شے، ہوکے بھر بھر رُنّی

بانو تے لمبڑاں دی دھی اے، توں ہِک دھی کمّی دی
جھلیئے! توں کیوں دیکھ کے اوہدا، سوہنا زیور رُنّی

ٹھنڈ بڑی سی سُپنیاں اندر، دیکھ اولّے رشتے
کُھلی اکھّ تے آل دوالے، دیکھ سمندر رُنّی

آپنی گلیوں لنگھدا تکّ کے کوئی سہریاں والا
خورے اوہ کیوں چِر تکّ اپنے، ویہڑے اندر رُنّی

کوئی تے پھٹّ شاوا ہوئی، کُجھ تے چیتے آئی
ایویں تے نہیں گئے ورھے دا، دیکھ کیلنڈر رُنّی

کِنّاں کرماں آلا سی اوہ، 'عاطف' جیہدے مگروں
پیو دیاں سِکاں، ماں دی ممتا، بھین دی سدھر رُنّی