کوئی سر نوں سولی چڑھا کے تے دیکھے
اوہناں نال نظراں ملا کے تے دیکھے
وفا دی تے ہر لوڑ نوں پورا کردا
مرے دل نوں اوہ آزما کے تے دیکھے
بڑے مٹھے درداں دی سوغات ملدی
کوئی یار دے در تے جا کے تے دیکھے
اخیر اوہ وی دھرتی دی چھاتی تے ڈگے
خیالاں دے پنچھی اڈا کے تے دیکھے
مرا پلہ خالی دا خالی رہا اے
ترے ناں تے سکے چلا کے تے دیکھے
کسے مینوں عزت دی نظرے نہ ڈٹھا
میں غیراں دے غم دل نوں لاکے تے دیکھے
اوہ اپنی پناہ ڈھونڈ لیندا اے اختر
جو من اپنے وچّ جھاتی پا کے تے دیکھے
