اساں باہُو دی بولی بولدے سانوں پیر فرید دی جاگ
اساں سچے قول قرار دے ساڈی ستھری صاف دلیل
ساڈا کئیں نئیں جھیڑا جھیڑیا اسی اپنے آپ وکیل
اساں راتاں کٹیاں جاگ کے ساڈے روندیاں گزرے سال
ساڈے اج وی کچے کوٹھرے ساڈا راہ تے بجدا مال
اساں روگ پرایا پالیا ساڈی کئیں نئیں جاتی نیک
سانوں اس وی اکھیاں جانگلی اساں جس نوں دِتی ٹیک
اجاں پی کے کنگوں گھاٹیاں ساڈے سُتے پئے پردھان
اجے چھوت چھپتن کھیڈ دے ساڈے بہادر شیر جوان
جداں جٹکی وسوں جاگسی ساڈے جگ تے ویکھی ٹھاٹھ
ساڈے ویری کمسن خوف توں اِنج بدلے لیسن راٹھ
جیوے مہر مراد دلیل دے لیا احمد خان دا ویر
اِنج وجیا جٹ انگریز نوں نسوں چا ونڑ دِتا پیر
اساں کالا پانی بھوگیا نئیں من دی منی ہار
اساں پرمی اپنے دیس دے سن رہتل نال پیار
اساں سک دا دیوا بالیا اساں ویکھے سُکھ دے خاب
ساڈی عاقب جھوک رنگیلڑی شالا وسے دیس پنجاب
