آیا مانگھ مہینہ یارھواں
اِک باقی رہندا بارھواں

سانوں سوہنے دا غم کھاندیاں
ہوئی مُدت پَچھو تاندیاں

کدی آ پیارے سجناں

میں نِج تتی نیہوں لایا
جو کیتا سی سو پایا

ہُن ہار سنگاراں پھُوکدی
کر کھلِیاں بانہیں کُوکدی

کوئی واقف ناہیں حال دا
کیہ بات کہاں اِسرار دی

دِن پل پل وڈا آیا
ہُن پالے جوش ہٹایا

میں عُمر گذاری روندیاں
نِت ہنجوں مل مل دھوندیاں

ہُن پوے قبول دُعا جے
میں عاجز اوگنہار دی

اساں ایہہ بھی ماہ گذاریا
وچ تیری تک پیاریا

توں گیوں محبت توڑ کے
فیر خبر نہ لئیو موڑ کے

تینوں ترس نہ میرے حال دا
میں تیرا نام چتاردی