کیتا اے کردار ہیرو دا، جیہنے امن کہانی وچّ
اپنے ساہ وی دے چھڈے نے، میں اوہدی نگرانی وچّ
ایویں تے نئیں غم دنیاں دے، میرے گھر وچّ آ جاندے
چار دہاڑے رہِ چُکے نے، ایہہ میری مہمانی وچّ
مکھ توں اڈیا دیکھ کے پلہ، ہوئی غلطی دیکھن دی
دانستہ تے میں نہیں کیتی، ہوئی اے نادانی وچّ
سنیا اے ہن تخت وفا دا، اوہنوں ملنے والا اے
کاش ! کدی آ جاوے مینوں، موت اوہدی نگرانی وچّ
فصل وفا دی جس تھاں بیجی، اتھوں وڈھی زخماں دی
گزر گئی اے کلّ حیاتی، اپنی تے قربانی وچّ
ایہدے پتر کھچدے پئے نے، چادر ایہدے سر توں اج
لگدا اے ہُن مر جائے گی، ماں بولی عریانی وچّ
بنھ آزاد اے عزم مرے دا، بھاویں ٹکراں مارے پئی
اینا زہرا رہن نہ دتا، بُھوتی ہوئی تغیانی وچّ
