ساہ تے پچھلے سالاں وچ وی رئے نیں تنگ بھراوا
توں وی آن چڑھونے خورے کیہڑے رنگ بھراوا
تیرے اگے بیتے سالاں دے میں جھرنے جھورے
ڈاھڈے لوکاں ہتھوں لٹے جاندے رئے کمزورے
اکھاں وچ اڈیکاں رہیاں بُلھیاں تے ہٹکورے
توں کی جانے جیویں لنگھے ساڈے ڈنگ بھراوا
ساہ تے پچھلے سالاں وچ وی رئے نیں تنگ بھراوا
دکھ دے پکھڑے اُتے ناپے چن سورج نے پندھ
لہو ناں لِبڑی رئی اے آل دوالے دی ہر کندھ
درداں ساڈے ساہواں دے وچ کھوبی رکھے دند
اپنے گھر وچ لڑ دے رئے آں اوپری جنگ بھراوا
ساہ تے پچھلے سالاں وچ وی رئے نیں تنگ بھراوا
میرے سجے کھبے کوکاں ہاہواں چیک چیہاڑے
کیہدے اگے میں دل کھولاں کیہڑا سن دا ہاڑے
تگڑے تگڑے ہُندے جاندے ماڑے اصلوں ماڑے
ساڈے حاکم پی کے ستے زر دی بھنگ بھراوا
ساہ تے پچھلے سالاں وچ وی رئے نیں تنگ بھراوا
شالا ایہے سال پروہنا خیر دا آیا ہووے
آپے ہاسا ترسے ہویاں بُلھاں نوں آ چھووے
ہُن تے درد تھیکواں ساڈے نین پرینوں چووے
ہن تے چِسکاں ڈھو ڈھو ہنمبے ساڈے انگ بھراوا
ساہ تے پچھلے سالاں وچ رئے نیں تنگ بھراوا
