سُولاں توں جے ڈردا ریہندا

سُولاں توں جے ڈردا ریہندا
ککھاں توں وی ہولا ریہندا

ضد نہ کردا بالاں وانگوں
مٹی بن کے بُھردا ریہندا

کیہ ہونا سی جے کر میں وی
تیرے ناں تے جیندا ریہندا

گھر دی ایویں لُگ ناں ہوندی
جے کر جاگن والا ریہندا

گل تے سِدھی ساویں سی پر
قدرت ولوں اوھلا ریہندا

چار چفیروں ننگی جاتی
اک ادھا تے پردہ ریہندا

لڑدے بھڑدے کٹھے ریہندے
ویہڑا جے کر سانجھا ریہندا

اوڑک کُھل ای جاندا ناصر
بُوہا مل کے بیٹھا ریہندا