ہس ہس آکھن کڑیاں بالے اکھاں نوں

ہس ہس آکھن کڑیاں بالے اکھاں نوں
لگ جاون تے کون سنبھالے اکھاں نوں

رکھیا کیہ اے خورے اوہدے سینے وچ
دل ہووے تے کسراں ٹالے اکھاں نوں

پہلوں اکھاں ہون حوالے اکھاں دے
بعدوں اکھاں دین حوالے اکھاں نوں

سجن اکھاں، اکھاں وچ نچوڑ گیا
ایویں تے نہیں مِلے اُجالے اکھاں نوں

سارے سفنے سڑ کے کولا ہوگئے نیں
اگاں لا گئے دیوے بالے اکھاں نوں

طاؔہرہ کانی اکھیں ویہندے رہندے نیں
منظر اوہو ویکھے بھالے اکھاں نوں