بندہ گندہ ظالم مندہ
ظلماں باہجہ نہ کوئی دھندہ
تتر مُک گئے کونک بھی موئے
جنگل بیلے واندے ہوئے
پیلے ککراں نی چھاں روئی
ڈوڈنڑی مر گئی پِدّی موئی
ویلے نال کویلا ہویا
کالا ڈھوڈر کاں بھی مویا
آ ہلنڑے وچ ہنڑ آنڈڑا کوئی نئیں
بلبل چِڑی کُشانڈڑا کوئی نئیں
انہا گھگُو نظر نہ آوے
اُڈ اُڈ باز نہ چِڑیاں کھاوے
چھپری آلی چھاں مُک گئی اے
کاں مُک گئے
کاں کاں مُک گئی اے
ہلاں آکے چھٹ نہ مارن
باشے ہنڑ نہ کھب کِھلارن
گُھگی کبوتر تے مرغابی
یاد آوے اوہ بگلا آبی
اُڈے جیجوں پِھرے بھمیری
اپڑے بدلاں کول ٹٹیری
چِڑی ترکھانڑ اوہ سوہنڑا ہُد ہُد
کیڑے نپے لٹورا کُد کُد
لمی پٹی ہو گئی لکُی
اُڈ گئی ٹٹنڑ، گیڑا گُھگی
گُھگیاں گُھگو گُھو نہ بولنڑ
کِکراں وچ نہ اُڈے سوہلنڑ
نیل چاہے نے ڈیرے نئیں رہے
کنڑکاں وچ بٹیرے نئیں رہے
کنڑک انگوری ہنڑ نہ کھاؤن
تلیر بن کے ڈار نہ آؤن
نظر نہ آوے کِتھے چروکا
نیلی چونگاں آلا ٹوکا
کسیاں وچوں دھرنگے مُک گئے
ہلو گنج اوہ گنجے مُک گئے
لاڑلی ہُنڑ نہ پاوے رولا
گُم گیا کِدرے چِڑی ببولا
دل کمے تے آوے جھونڑاں
یاد آوے اوہ شیر پدونڑاں
ٹہلیاں مکیاں چھاں مُک گئی اے
سوہنڑی بول بتاں مُک گئی اے
گم گئی کدرے کات ولارنڑ
نہ ہُنڑ طوطے سیٹیاں مارنڑ
میں مرساں تاں مُکسی جھگڑا
جیجوں مر گیا باز تے لگڑا
