میں سی مننا کتھے رب نوں
رب آپوں منوایا اے
دنیا دے وچ تھاں تھاں اُتے
رب ای نظریں آیا اے
دھرتی اُتے ہر تھاں رب نے
رحمت دا مینہہ پایا اے
بدلاں شکلاں بھر بھر پانی
فصلیں آن رجایا اے
دریاواں رل مِل نال سمندر
رب دا گیت ہی گایا اے
لہراں سجدے مُڑ مُڑ دیون
رب نے کرم کمایا اے
پَھلاں کِھڑ کِھڑ ونڈے ہاسے
اپنا رنگ وکھایا اے
خوشبو مِل مِل نال ہواواں
رب دا رنگ لٹایا اے
حوالہ: اُڈیکاں، سچیت کتاب گھر 2009؛ صفحہ 21 ( ویکھو )
