اِنج حالوں بے حال نی مائے

افضل احسن رندھاوا

اِنج حالوں بے حال نی مائے
بُھل گئی اپنی چال نی مائے

دوزخ تیتھوں دوری، جنت
تیرے آل دوال نی مائے

چالی ورھے اُنیندر دے، ہُن
سینے لا سوال نی مائے

میں دریاواں دا ہانی ساں
ترنے پَے گئے کھال نی مائے

شہر دے سُکھ کِیہ لکھاں تینوں
مُل نہ لبھدی دال نی مائے

میری چِنتا نہ کر، ایتھے
رُلدے سب دے بال نی مائے

جِیہنوں مِلیے پھاہ لیندا اے
ہر بندہ اک جال نی مائے

ہُن نہ دُدھ پیائیں پُورا
وڈّے ہون نہ بال نی مائے

ہُن تے کُجھ نہیں نظریں آؤندا
ہور اِک سُورج بال نی مائے

اونے پھٹ میرے جُثّے تے
جِنّے تیرے وال نی مائے

افضل احسن لوہیا سی، پر
کھا گیا درد جنگال نی مائے

دوجی لِپی وچ پڑھو

Roman    ਗੁਰਮੁਖੀ   

افضل احسن رندھاوا دی ہور شاعری