تیرے میکدے اگے مسافراں تے
آ لتھی ہے سفر دی شام ساقی
تیرے میکدے دا بڑا ذکر سنیا
بڑا سنیا ہویا تیرا نام ساقی
مارے کُٹّے ہاں منزلاں بھاریاں دے
پیاسے ہاں اسیں تمام ساقی
اپنی سبھ توں ودھیا شراب والا
بھر بھر دئی جا جام تے جام ساقی
جھکھڑ جھلدے پئے بدامنیاں دے
گھرو گھری ہے نواں کہرام ساقی
دَور پچھے وی کوئی چنگا نئیں ڈٹھا
دَور اج دا بہت بدنام ساقی
دُنیاں لمکدی لمکدی لمک جانی
پیا دسدا صاف انجام ساقی
دُنیاں ڈبّ جانی، ہر شے مکّ جانی
رہِ جائیگا ﷲ دا نام ساقی
تریہہ ازلاں دی اندر پیاسیاں دے
فیض اپنا کر اج عامَ ساقی
پلّے دام نہیں تینوں دین جوگے
کر کے رکھ لئیں سانوں غلام ساقی
اک حُسن تیرا دُوجا قُرب تیرا
تِیجا تیز شراب دا جام ساقی
ایدوں ودھ نہ کوئی بہشت ہونا
ایدوں ودھ نہ کوئی انعام ساقی
مُلّ پاؤن نہ کدی فقیر اِسدا
بسّ طلب دی بانہہ الار دیون
ہوویں توں جے گاہک تے وک جائیے
اسیں وچ بازار بے دام ساقی
صدق ویکھ لئیں عاشقاں صادقاں دا
تیری طلب وچ خاک در خاک ہوسن
تیرے نام دا بکلا مار کے تے
ہون نامور توں بے نام ساقی
ہر رات دے بعد ہے دن چڑھدا
ایہہ اصول فطرت دا تے سائنس دا ہے
ساڈی رات دے بعد نہیں دن چڑھیا
ساڈے رہی ہے رات مدام ساقی
پوڑی کفر دی چڑھ کے لہہ آئے
کئی چوراں توں قطب مشہور ہوئے
جس تے کرم دی نظر تیری پے جاوے
انت اوسدا خیر انجام ساقی
ساقی نامہ لکھن دا شوق تینوں
روئیں شکل نوں افضلا احسنا اوئے
بہہ جا ساقی دے گوڈے مڈھ جا کے
گھلن لگّ پئے گا الہام ساقی
چل کھولیے باب اداسیاں دے
کریے سفر دا نواں سامان ساقی
تیرا میکدا چُکّ لے نال چلیے
سفر رہے گا بڑا آسان ساقی
کلمے! ڈھونڈیے قافیے ہور کدھروں
ودھے ہور تیرے نامے دی شان ساقی
تیرے حسن نوں ہور کجھ کھولھ دیئیے
ہوئے ہور ذرا میرا بیان ساقی
جتھے مکنی گلّ اوتھوں شروع کریے
کر سُنان دا ہور سامان ساقی
پیالے بھر بھر رکھدا جا اگے
خشک ہووے نہ میری زبان ساقی
کِنّے رتّ دے لنگھ دریا آئے
کِنّے ہوئے ساڈی رتّ دے گھان ساقی
چیرو-چیرو جُسّا لیرو-لیر لِیڑے
ویکھ لباں تے آ کھلی جان ساقی
جِتھوں ٹُرے ساں اوتھے ہی پئے پھریے
کھوپی ڈھانڈ جویں کسے خراس دے ہاں
راہ مُکدے نئیں ساہ مُک چلے
نئیں منزل دا اجے نشان ساقی
دل ٹٹدا ٹٹدا ٹٹّ رِہا
جان نکلدی نکلدی نکل چلی
جے نہ ہویا اج دیدار تیرا
سمجھیں نکل گئی ساڈی جان ساقی
آگُو بن گئے آگُو ڈاکواں دے
لُٹ مار گھراں وچ عام ہوئی
ایتھے داد فریاد نہ سُنے کوئی
آگُو، پُولَس، ڈاکو اک جان ساقی
پیا ادب ویچاں بِل تارنے نوں
تاں وی گھر دے بل نہ تار ہندے
پِہلوں ادب دے گاہک اتھے ہین کِنّے
دوجے ادب تے پیسہ نہیں ہان ساقی
تیریاں اکھاں چہ ڈُبّ کے مر رہیے
باہر کڈھے نہ کوئی سمندراں چوں
ہوئیے ذات دے وچ فنا فی اللہ
کوئی ہوئے نہ ساڈا نِگھبان ساقی
چھڈّ دکھ ساڈے کتھوں تیک سننے
متّ ماریے دے شراب وافر
بھل زاویے کوڑ کڑتناں نوں
پئے پیویے تیری مسکان ساقی

پکے ڈیرے خزاں نے آن لائے
لگدا رُسّ گئی ساتھوں بہار ساقی
کتے روشنی ذرا نئیں نظر آؤندی
چاروں طرف ہنیر غبار ساقی
گھر اماں نہیں، باہر اماں ناہیں
ہوئی زندگی سخت دشوار ساقی
گلّ پیالے گلاس توں ودھ گئی اے
دے گھڑا سانوں پہلے توڑ والا
جس وچ ڈوبیے فکر زمانیاں دے
جس وچ ڈوبیے غم ہزار ساقی
جس وچ ڈوبیے عمر بے کار گئی ہوئی
جس وچ ڈوبیے عشقَ ناکام ہوئے
جس وچ ڈوبیے ٹُٹیاں یاریاں دے
سارے ٹُٹ گئے قول قرار ساقی
دُکھ ودھدِیاں بیروزگاریاں دے
لَکھاں چُلھیاں دے ٹھنڈا ہون والے
پڑھے لِکھے بے کار کھوہ موہ کردے
لُٹدی سڑکاں دے اتے سرکار ساقی
کھوہ موہ دا عجب اک سلسلہ ہے
ڈِھڈّ ڈِھڈّ نوں ہی پیا کھائی جاندا
پُتر ماواں نوں لٹّ کے لئے جاندے
ویر بھیناں توں سخت اوازار ساقی
نہیں سُنگھن نوں وی انصاف ملدا
حاکم بنے قصائی نویں گلّ تے نئیں
پیسے والے لئی نئیں قانون ہندا
پہنچ لئی نئیں کجھ دشوار ساقی
دے دے درس انصاف برابری دے
سارے نظریے مذہب تے دین گئے
ویکھ تک نتیجہ جہان اندر
نہیں پڑھن دی لوڑ اخبار ساقی
معافی میریاں تلخ کلامیاں دی
اج پِیڑ کجھ ودھ ہے نشے نالوں
سٹّ لین دے دس گلاس اندر
ہو جائیگا سبھ اکسار ساقی
کیہ شے مارنے نوں دارو پیونے ہاں
اج تکّ نئیں ایسدا پتہ لگا
ہاں پی کے کجھ چِر بُھلّ جاندی
تیری دنیاں دی حالتِ زار ساقی
توں ساہمنے ہوویں تے ہو جاندا
نشہ دو گنا، چوگنا، اَٹھ گنا
کئی دن بعد وی تے پھیر رہے چڑھیا
تیرے نشے دا ایہہ خُمار ساقی
ایہدے وچ نئیں کوئی وڈیائی میری
میرے ساقی دے ظرف دی بات ہے ایہہ
ساڈے جہے بدحال قلندراں توں
ہندا کدے وی نئیں بے زار ساقی
اسیں حسن پرست ضرور ہے آں
اسیں ہوس پرست ذرا بھر نہیں
بخشن والے نے بخشیاں صاف نظراں
جنہاں وچ نہیں ذرا غبار ساقی
وصل کَٹنا کوئی بڑا کم نہیں
ہجر کَٹنا اصل جواں مردی
ہجر لیڑیاں وانگ ہنڈھاونے ہاں
اک پھٹے تے دوجا تیار ساقی
پلے زر نہیں، ہتھ وچ ہنر ناہیں
اسیں آئے جہان تے لین کی ساں
دتا ایہو جواب سیانیاں نے
ہندے بردے وی نے درکار ساقی
چھڈّ زاہدا تیرے نیں ہور مسئلے
ساڈے رِنداں دے ہور معاملے نیں
آؤن جان تیرا وی ہے میکدے وچ
تیرا کردا نئیں اعتبار ساقی

ودھے ہور رونق تیرے میکدے دی
نالے ہوئے دوچند جمال تیرا
دیوا بلدا تیرا نہ کدے بُجھے
جھلن پئے ہنیر ہزار ساقی
ایس وار نئیں کشتی دا حکم ہونا
ایس وار نہیں اوسنے بانہہ پھڑنی
ایس وار جے اُبل تنور پئے تے
رُڑھ جائے گا کُل جہان ساقی