تیرے نالوں تیرا درد بڑا سوہنا اے

ہسدیاں نوں روا دیندا اے
روندیاں نوں ہسا دیندا اے
گجرے لال بنا دیندا اے
بھر بھر جام پلا دیندا اے
تیرے نالوں تیرا درد بڑا سوہنا اے

دھپاں دے وچ چھاں کردا اے
رُتاں ساڈے ناں کردا اے
نہ کردا اے ہاں کردا اے
تکڑی ساڈی بانہہ کردا اے
تیرے نالوں تیرا درد بڑا سوہنا اے

پت جھڑ وچ گلاب کیارا
کالیاں راتاں دے وچ تارا
ہڑھ اندر مضبوط کنارا
تیتھوں کدرے پیارا پیارا
تیرے نالوں تیرا درد بڑا سوہنا اے

کھمب کھلار کے پیلاں پاوے
عرشاں اتے پینگھ جھلاوے
ڈگ پئے تے آن اٹھاوے
چُن چُن ماس جگر دا کھاوے
تیرے نالوں تیرا درد بڑا سوہنا اے

افضل راجپوت دی ہور شاعری

• ⟩  اوہ
• ⟩  اک نار
• ⟩  اک کوڑی آس ملن دی
• ⟩  اک ہور گلاس بناو
• ⟩  اگ
• ⟩  تاریخ لکھو تے ایہہ وی لکھنا
• ⟩  تیرے نالوں تیرا درد بڑا سوہنا اے
• ⟩  خواب تے ساتھ
• ⟩  خوش بخت
• ⟩  دکھ ایہہ ہے
• ⟩  افضل راجپوت دی ساری شاعری