جیون دا معیار بنا کے چھڈاں گا
اک الھڑ کردار بنا کے چھڈاں گا
جے تیرے اندر دا بندا جاگ پیا
تینوں اک فنکار بنا کے چھڈاں گا
غم دے جھکھڑ جھلدے نے تے جھلن دے
سدھراں دا مینار بنا کے چھڈاں گا
بھاویں دل دا لہو وی دینا پے جاوے
میں تینوں شاہکار بنا کے چھڈاں گا
نفرت بھریاں رسماں، ریتاں ڈکن لئی
سوچاں نوں دیوار بنا کے چھڈاں گا
میں فنکار آں پیار ہی میرا مسلک اے
دشمن نوں دلدار بنا کے چھڈاں گا
آصف آپنے شعراں راہیں اوڑک میں
ویرانے گلزار بنا کے چھڈاں گا
