ویہڑے دے وچ اک دن آیا سنگدا سنگدا عشق
میں پچھیا تے آکھن لگا میں آں جھنگ دا عشق
سخر دوپہرے ننگے پیریں موج چہ لڈیاں پاؤندا
اج میں اپنی اکھیں تکیا اک ملنگ دا عشق
اکھاں وچ لشکارے مارے مُڑ مُڑ اوہنوں تکاں
کالے رنگ دے بورڈ تے لکھیا چٹے رنگ دا عشق
ہوسکدا اے نبھ جاوے پر ڈر لگدا اے سُن کے
پتھراں نال تے نبھ نہیں سکدا کچی ونگ دا عشق
عشق عشق دا رولا پاؤنا چنگی گل نہیں مُڑ جا
ایہ وی چیتے رکھیں بشریٰ سُولی ٹنگ دا عشق
