پیڑاں نال یارانے ساڈے
پیڑاں نال یارانے
جگ وچ ہوکا دے دے کہیے
ہے کوئی درداں والا
چاواں نوں پھڑھ چلہے ڈھاوے
پیڑاں دا متوالا
گل نال لا کے چوپ لئیے سب
پیڑاں ایس بہانے
پیڑاں نال یارانے۔۔۔۔۔
ایہہ انملا پیڑ خزانہ
کد سبھناں دے لیکھیں
اس دے نیں حقدار اوہ ازلوں
عشق جنہاں دے ریکھیں
دھر توں سیس نوایا جنہاں
ساقی دے میخانے
پیڑاں نال یارانے۔۔۔
دل لوگڑ نوں پونی کرکے
تن دا چرخہ ڈھایا
پنجے تت علیحدہ کہتے
گیان دھیانے لایا
پیڑاں ان ان کھیس ہجر دا
کتیا ایس بہانے
پیڑاں نال یارانے۔۔۔
دل باگے دے ہر بوٹے نوں
کھڑ کھڑ پھٹن پیڑاں
ایہہ پیڑاں دے صدقے جگ تے
کٹیاں گئیاں بھیڑاں
ایہہ پیڑاں دے وٹنے سانوں
چاہڑے روپ سہانے
پیڑاں نال یارانے ساڈے
پیڑاں نال یارانے
