اُڈیک مُک گئی

ہوا چ خوشبوآں کہہ رہیاں نیں
گلاب ٹہکے نیں چہریاں تے
فضا چ گیتاں دی روشنی اے
تے رنگ مہکے نیں چہریاں تے
بہار گلشن چ آ رہی اے
بہار دی ہُن اُڈیک مُک گئی
اُڈیک مُک گئی

وچھوڑیاں دا گیا اے موسم
ملن دی رت آ گئی اے نیڑے
اخیر رانجھے دا جوگ مُکیا
تے ہیر نے چھڈے سیدے کھیڑے
اداس بلھاں تے ہوکے مکے
تے وگدے ہنجواں دی نہر سُک گئی
اُڈیک مُک گئی

جو کونج وچھڑی سی ڈار وچوں
اوہ ڈار دے نال آ رلی اے
ہوا جو پت جھڑ چ رُس گئی سی
بہار دے نال آ رلی اے
دلاں چ جو روز جُھل رہی سی
جدائی دی اوہ ہنیری رُک گئی
اُڈیک مُک گئی