ڈُب مرن دی گل

ڈُب مرن دی گل تاں
بوہت پُرانی ہو چکی اے
آ، آپاں اک نویں لیک پائیے
ڈُب مرن دیاں گلاں چھڈئیے
من دی سوہنی
زندگی دا ساگر تر نئیں سکدی
جسماں دا کچا گھڑا
ہوساں دیاں پہراں وچ لے کے
روز ڈُب جاندی اے
اوس نوں پار لنگھائیاں

من دی سوہنی پار کنج لگے
زندگی دی کشتی، ہوس دا ساگر
تے تن دا ڈُبنا
روز ہوندا اے
دریاواں وچ ڈُبن دی گل وی
بوہت پُرانی ہو گئی ہے
آ، آپاں اک نویں لیک پائیے
ڈُبن دی گل چھڈ
سچ بیجئے، سچ اُگائیے