میں ننگے پیریں
اگ تے ٹُر دی ہاں
نت جیوندی ہاں
مردی ہاں
اک اگ قتل کردی ہاں
میں کینی چر بھرم پالاں گی
جُثہ جلاواں گی
سچ توں دوڑاں گی
چوراہے وچ ڈِگاں گی
دم توڑاں گی
میں جو نت زندگی دی دوڑ وچ
ننگے پیریں اگ تے دوڑ دی ہاں
بِنا کھنب اُڈدی ہاں
اپنے زندہ ہون دا ہنکارہ
آپ ہی میں بھر دی ہاں
پُھلاں دے جنگل اُگاؤندی ہاں
مہکاں ونڈ دی ہاں
چفیرے پسری اگ وچ
ننگے پیریں ٹُردی ہاں
اگ جیوندی ہاں
اگ مردی ہاں
تُسی جو کُھلے آکاش وچ
اُڈاریاں بھرن دا دعوا کردے ہو
چفیرے اُگے سچ دے جنگل نوں ویکھ کے وی
ان دیکھا کر دے ہو
اک پاپ نوں جنم دیندے ہو
اک پاپ دی حامی بھر دے ہو
تُسی ایس جنگل وچ اک دن سڑو گے
حوالہ: سُکّے پتے؛ صفحہ 40