مینوں لبھو

چار چفیرے میرا پسارا
میں جو سوچاں اوہی ہوندا
میں چاؤندا اوہی کردے
اُچے اُچے محل منارے
دھرتی نالوں ناتا ٹُٹیا
دوسریاں نوں لبھدا پھردا
اپنے نالوں ناتا ٹُٹیا
مینوں لبھو!

میں جگ نال نہیں ساں ٹُریا
ویہڑے وچ سی چانن نچدا
چُلھے وچ سی نِگھ بتھیرا
اندر باہر پھریا وسارا
میں اودوں نہیں ساں گواچا
چانن اندر باہر بتھیرا
جگ وچ دیوے رہیا جلاؤندا
اپنیاں توں توڑ کے رشتہ
نال بیگانیاں ککلی پاؤندا
کجھ وی یارو راس نہ آیا
اپنیاں کولوں دُور ساں ہویا
چانن وچ گواچا یارو
مینوں لبھو!