جو پیندا جام اُس ساقی دا
اوہ اکو حرف پکاندا اے
اوہ سانجھ نہ غیر تھیں پاندا اے
اوہ صبر دی روٹی کھاندا اے
جو پیندا جام اُس ساقی دا
تن من دا ہوش گوا بیٹھے
جان اپنی گھول گھما بیٹھے
اوہ پریت دا چولا پا بیٹھے
جو پیندا جام اُس ساقی دا
وچ من دے یار وساندا اے
اوہ مست الست سداندا اے
سبھ جھوٹھے شور مکاندا اے
جو پیندا جام اُس ساقی دا
دن رات اوہدے لئی شادی اے
اوہ گھمدا وادی وادی اے
اوہ دیندا خوب منادی اے
جو پیندا جام اُس ساقی دا
ناں اکو اوہنوں یاد رہوے
ہر دُکھ توں اوہ آزاد رہوے
پی وصل پیالا شاد رہوے
جو پیندا جام اُس ساقی دا
