توں کی جانیں میں کنے ظلم راہ دے جر کے آیا ہاں
میں جیندا آ گیا ہاں در تیرے پر مر کے آیا ہاں
میں جِتن واسطے آیا ہاں تیرے پیار دی بازی
ایہہ مورکھ سمجھدے نیں زندگی چوں ہر کے آیا ہاں
میں تیرے حسن دے ساگر دے اندر لین ہوون لئی
غروراں دے پہاڑوں برف وانگوں کُھر کے آیا ہاں
زمانے دا چنھاں اتھرا سی وگدا شوکدا ہویا
میں تیرے پیار دے صدقے ایہنوں وی تر کے آیا ہاں
توں کر قربان میرے عشق اُتے جندڑی اپنی
میں تیرے حسن دے جلوے دے اُتوں مر کے آیا ہاں
