اج کوئی نظم نہ لکھی گئی
نہ دل نوں کجھ ہویا
اج میں تھوڑی دیر لئی ہسیا
تھوڑی دیر لئی رویا
اج اک کول کھلوتے دل دی
دُوروں واج اے آئی
اج اک دور کھلوتے دل دی
واج رہی گھبرائی
اج اک چندن مشک بدن نے
بھید پھرولے میرے
اج انبراں تک دل نے لا لئے
تھاں تھاں اُتے ڈیرے
اج اک پیڑ دا رس نچوڑ کے
کھنڈ وچ گھول کے پیتا
اج توں پہلاں ایس طرح میں
کدی نہیں سی کیتا
اج اک یاد دے پچھلے دُکھ نوں
چانن دے نال دھوتا
اج میں کئی ورہیاں دے بعدوں
اپنے نال کھلوتا
اج فیر اُڈدا انبراں دے وچ
سوچ دا پنچھی چھوہیا
اج میں موت دے ہتھ وچ بہہ کے
موت کولوں نہ مویا
اج کوئی نظم نہ لکھی گئی
نہ دل نوں کجھ ہویا
اج میں تھوڑی دیر لئی ہسیا
تھوڑی دیر لئی رویا
حوالہ: میں چیتر نہیں چکھیا؛ سانجھ؛ صفحہ 75