صاف جواب پری نے دتا، سن توں ملکہ خاتوں
نہ محرم نوں منہ نہ دساں، اس گلوں باز آ توں
میں کوئی لنڈی اچکی ناہیں، ماں پیو میرے کیہے
راہیاں نال کراویں یاری، چھوڑ خیال اجیہے
شان میری دی لایق جاتوئی، اوہ مسافر کوئی
گلیئیں رلدیاں نوں منہ دساں، لاہ شرم دی لوئی
کی دیدار میرا تکّ سکسی، اوہ غریب بیچارا
نا لایق نوں کیوں دسالاں، جوبن اپر اپارا
ایہو قدر میرا تدھ پایا، واہ ملکہ واہ ملکہ
ایسے ویسے نونکد ملسی، روپ میرے دا جھلکا
چور ہووے کوہ طور نہ جھلے، نور حضوروں جھاتی
لنترانی آکھ اس تائیں، ہو رہو چپّ چپاتی
ارنی ارنی بولے ناہیں، کھہڑا ساڈا چھڈے
نہ محرم دیدار نہ پاسی، لکھ چلیہے کڈھے
