دھرتی جنت بن جائے

ڈوڈیاں وچوں پُھل نکلدے کیوں کملائے جاندے نیں
سانبھ پُھلاں دی ہوندی نئیں تے بوٹے لائے جاندے نیں

پُھل کھڑن خوشبواں مہکن دھرتی جنت بن جائے
پر کومبلیاں نوں ڈنگراں وانگواں راکھے ای کھا جاندے نیں

چوہدریاں گھر پُتر ہویا ڈوم ودائیاں دیندے نیں
ست سو ایکڑ والے ایتھے نام رکھائے جاندے نیں

ہسپتالاں وچ ملے نہ دوائی مزدوریاں دیاں بچیاں نوں
زرداراں دے کُتے ایتھے داخل کرائے جاندے نیں

زر زمین تے زن دے جھگڑے ہولی ہولی ودرے نیں
اپنیاں چوہدریاں قائم رکھن لئی گھول کرائے جاندے نیں

ویر بھیناں دے جنگ وچ مُردے بیوہ ناراں ہوندیاں نیں
کشفی امن بنا نہیں چارہ سچ سیانے آندے نیں