مزدور کدی زکوۃ نہیں لیندا

عزرائیل میری جان نہ کڈیں میرے کم بہتیرے رہندے
میرے باہجوں ایہناں کون سمبھالے جیہڑے بابل بابل کہندے

مینہ پوے پرنالے کولوں کائیاں دی چھت چوندی
تینوں پتہ یتیماں دے نیں جیکر کوٹھے ڈیہندے

اجے میں پوری دنیا دے وچ پھر کے ہوکا دینا
کر مزدوری کھاون والے نہیں زکاتاں لیندے

رب دے نال وی دھوکا کر دے وڈیاں داڑھیاں والے
تگڑے نوں جی جی کردے ماڑیاں دے نال کہندے

اک پاسے نت پاون پوشاکاں حلہوے ککڑ کھاندے
اک ڈھڈوں بھکھے پیروں ننگے ہر دُکھ سِر تے سہندے

بھٹیاں دے وچ مزدوراں نوں جیہڑے سٹ کے ہسدے
بن کے راٹھ اسمبلیاں دے وچ اُچے ہو ہو بہندے

میں باغی تے نئیں ایویں تینوں ویریاں نیں بھرکایا
حق دی گل کرے جے کشفی کافر کافر کہندے