دسمبر دی اِکتّی نوں
گئی عادت نا شاپنگ دی
خریدی اوس لئی جرسی
نواں اسکارف تے لوئی…
ہیپی نیو ایئر دا کارڈ
نویں اکّ سال دی ڈائری
کتاباں تے قلم دے لئی
جدوں وڑیا دکان اندر
تے اوتھے ویکھیا اس نوں
جیون ساتھی نال اس دے
"تمہیں ملتے تو اچھا تھا"
سائدلا شاہ جی دی
کتاب ہتھاں چ سی اس دے
میں اوتھوں اکھّ بچا کے
چپ چپیتا باہر ٹُر آیا
بڑی ہی شام ٹھنڈی سی
تے اینی ٹھنڈ وچ باہر
بھکھارن اک کڑی کوئی
پرانی پاٹی لوئی نال
مونہہ ادھا لُکایا سی
میری خیر منگدی نے
میرے ولّ ہتھ ودھایا سی
اوہ تھیلا تحفیاں والا
میں اوہدے ہتھ پھڑایا چا
تے بدلے اس تھیلے دے
اک گنڈھڑی دعاواں دی
میں ٹُریا لے کے اوہدے توں
میں تھکے ٹُٹے قدماں نال
اپنی بائیک تک اپڑیا
ماری ککّ تے پچھلے پیریں
اپنے پنڈ ولّ مڑیا
اس دن توں قمر اجّ تک
دسمبر دی اِکتّی نوں
میں شاپنگ اجّ وی کردا ہاں
لوئی جرسی تے اک اسکارف
ڈائری، کارڈ، قلم، کتاب
خریدن شہر جاندا ہاں
تے نویں سال دا تھیلا
اوہ سارا تحفیاں والا
ٹھنڈ پالے چ ٹھردی ہوئی
کسے وی مائی بڈھڑی نوں
یا کسے چھوہری چھکری نوں
میں دے کے گھر آ جاندا ہاں
دسمبر دی اِکتّی نوں
میں اجّ وی شہر جاندا ہاں
