میری تے تہاڈی سانجھی
ذہنی زمین وچ
چپے چپے تے
عقیدتاں زباناں
رنگ، نسل تے علاقیاں دیاں
بارودی سرنگاں
وچھا دتیاں گئیاں نیں
گلوب لائزیشن دے ناں تے
غربت، بے بسی، بے کسی
جہالت تے محرومی دے
ٹائم بمب
ساڈیاں سوچاں تے جذبیاں وچ
لکا دتے گئے نیں
ایہ بارودی سرنگاں
تے ٹائم بمب
ساڈے جسماں تے خاباں نوں اکثر
کرچاں وچ ونڈ دے رہندے نیں
ایہناں کارن
ساڈیاں بستیاں وچ
موت دے میلے لگدے نیں
تے لہو دی بارش ہوندی اے
سانوں آزادی ، ایکتا،امن
تے پیار دی راہ توں
کراہ کرن لئی
ساڈے سیاسی تے مذہبی گروہ
ساڈے دانشور تے لکھاری
ٹی وی، ریڈیو تے اخبار
اکھراں دے ایس جال
وچھاوندے نیں
جنہاں وچ پھس کے
اسیں اپنے اصل مسئلیاں توں
دور بہت دور
نکل جانے آں
جے کر گلوب دے سبھناں انساناں نیں
اپنے اپنے حصے دی دھرتی
اپنی پچھان
اپنیاں رسماں ریتاں نال
جڑے ہون دے نال نال
سارے گلوب دے
انساناں نال
اپنے آپ نوں نہ جوڑیا
تے ایہ صدی آوندی بھلک نوں
پرچھاویاں دی صدی اکھوائے گی
