گل کوئی عشق دی کر، پیار دا قصہ سُنا

گل کوئی عشق دی کر، پیار دا قصہ سُنا
داستان منصور دی یا دار دا قصہ سُنا

چھڈ گُنجل دار زلفاں دی بجھارت شاعرا
اِنقلاب وقت دی جھنکار دا قصہ سُنا

اج وارث دے قلم دی سرسراہٹ نوں بلا
ابن قاسم دی جری تلوار دا قصہ سُنا

جتھے پی کے کجھ شرابی غیرتاں نئیں ویچدے
ساقیا اوس محفل سرشار دا قصہ سُنا

اج سوہنی تے گھڑے دے قول دا افسانہ لکھ
مڑ کے عزت بیگ دے اقرار دا قصہ سُنا

جتھے کھڑ کے پُھل امیداں دے نئیں کملاؤندے
اوس خزاں نا آشنا گلزار دا قصہ سُنا

چھیڑ ساغر ونجھلی تے دِل دا اِک انمول گیت
بن کے رانجھا حُسن دی سرکار دا قصہ سُنا