ذکر تیرا چِھڑ گیا موسم شرابی ہو گیا

ذکر تیرا چِھڑ گیا موسم شرابی ہو گیا
کی ہویا جے رنگ میرا وی گلابی ہو گیا

بُھکھا ننگا سی جدوں اوہ دوستی دا مان سی
یار جد دا لکھ پتی ہویا حسابی ہو گیا

بھٹکدا ساں جد ہوا وچ قوم دا شاعر ساں میں
گلّ جدوں مٹی دی کیتی میں پنجابی ہو گیا

شعر کہنا درد دے صحرا دے وچ ہے بھٹکنا
شعر سُننا دوستا لوکاں دی ہابی ہو گیا

دشمنی وی پیاری لگدی بیتے ہوئے کلھ دی
اجّ دی یاری دا وی مذہب رقابی ہو گیا

شعرگو رہندا تے خبرے کوئی وی نہ جاندا
جھوٹھی شہرت واسطے میں انقلابی ہو گیا

بندی واناں دے جدوں وی بھاگ جاگے نے سلیم
ویریاں دا ویر وی خُشیاں دی چابی ہو گیا

سلیم کاشر دی ہور شاعری

• ⟩  تیتھوں وی کوئی گلّ نہ ہوئی، میں وی دل دی کہہ نہ سکیا
• ⟩  جو بول زبانوں نکل گیا
• ⟩  ذکر تیرا چِھڑ گیا موسم شرابی ہو گیا
• ⟩  شام پوے تے بال کے دیوے، نھیریاں دے ساہ گھٹو لوکو
• ⟩  غم کاہدا جے دل ٹٹن دی، ذرا آواز نہ آئی
• ⟩  قبرستاناں وچ ہنگامہ شہراں وچ تنہائی اے
• ⟩  وچّ ہنیریاں لبھدی پھر ہن، کر کر لمے ہتھ
• ⟩  سلیم کاشر دی ساری شاعری