گل پا کے کفنی ہجر دی
میں جیوندی پے گئی گور وے
میں ہیر ساں رانجھن یار دی
مینوں لٹ کے لے گئے ہور وے
کسے قدر نہ پائی ہُوک دی
میں وارث وارث کوکدی
میں اپنا آپ وساریا
میں ملکی دا انگ دھاریا
اج دے کے گُڑ دی زہروی
میں اپنے آپ نوں ماریا
کیوں پیچا پاوندی عشق دا
میرے ہتھوں ٹُٹ گئی ڈور وے
میں ہیر ساں رانجھن یار دی
مینوں لٹ کے لے گئے ہور وے
کوئی دل دیاں رمزاں جان دا
کوئی جیو دا روگ پچھان دا
کوئی قبریں دیوے بال دا
کوئی مان ودھاوندا مان دا
میرے ویہڑے سُنج نہ شوکددی
ایتھے پیلاں پاوندے مور وے
میں ہیر ساں رانجھن یار دی
مینوں لُٹ کے لے گئے ہور وے
ہس ہس کے موتاں سہن وے
کیویں ہیراں جیوندیاں رہن وے
اج بہہ کے اپنی لاش تے
اسیں آپ کریے وین وے
حوالہ: شیشہ، طاہرہ سرا؛ سانجھ 2018؛ صفحہ 83 ( ویکھو )
