اسیں صبر کرکے چُپ ہو بیٹھے
بہت اوکھیاں ایہہ فقیریاں نیں
نظر تھلے کیوں لیاونی کن پاٹے
جس دے ہس دے نال زنجیریاں نیں
جیہڑے درشنی ہنڈوی واچ بیٹھے
سبھے چٹھیاں اوہناں نے چیریاں نیں
تسیں کرو حیا کواریو نی
اجے ددھ دیاں دندیاں کھیریاں نیں
وانگ بڈھیاں کریں پک چنڈ گلاں
متھے چنڈیاں کواردیاں چیریاں نیں
کہی چندری لگی ہیں آن متھے
اکھیں بُھکھ دیاں بھون بھنبیریاں نیں
میں تاں مار تلیٹیاں پٹ سٹاں
میری اُنگلی اُنگلی پیریاں نیں
وارث شاہ فوجدار دے مارنے نوں
سیناں ماریاں ویکھ کشمیریاں نیں
