کوئی دیویں کم دی مَت بِھرا

کوئی دیویں کم دی مَت بِھرا
ایتھے کد آواں گے وَت بِھرا

جنھیں بولیا حرف محبّت دا
ایتھے اُہدی بن گئی گَت بِھرا

ایویں کنداں پئے اُسار دے او
ایتھے پَینی کوئی نئیں چھت بِھرا

تُوں کلّا ایدھر نہ آوِیں
میری راہ وچ بیٹھے سَت بِھرا

اَیتھوں نیویں پا کے نسّی جا
ایہہ پَریا لاندھی پَت بِھرا

جَد چاول گھر وِچ مُک گئے
پے مونہوں منگن بَھت بِھرا

اوہنوں واصؔف دل وچ ویکھ لے
اَینویں بُہتا شور نہ گَھت بِھرا