اک حشر دیہاڑاں منگاں میں

قبراں وچوں اُٹھن لوکیں
دس حیاتی دا حال
کیویں لنگھائیاں اینیاں عمراں
کیویں لنگھائے سال

کیویں سیت پالیاں وچ
جیبھاں ٹھڑیاں، اکھر سنگڑے
کیویں سخر دوپہراں اندر
تلیاں سڑیاں، اتھرو پنگھرے

ہُن دوزخ اجیہا منگاں
اکلاپا جیہڑا ساڑ ساڑ مُکاوے
اُسرے اک بہشت سانجھ دا
جتھے چانن جوت جگاوے

حشر دیہاڑا اک میں منگاں
جتھے تھیون سارے لیکھے
اک اک گل دا ہووے نتارا
خلقت ساری اُٹھ اُٹھ ویکھے

ٹُٹے کفر تے چانن نِسرے
کُھلے وقت دی چال
جِند نال اِنج پُرچّے
دھم دھم پوے دھمال