پئی دل برہوں دی بُھوم

پئی دل برہوں دی بُھوم
بُھلے درس ہنر دے
دردیں لائی دُھوم
وِسرے وِرد سحر دے

تھئی تحقیق مسائل ذوقی
گذرے علم علوم
پیارے فکر، نظر دے

چھٹڑی راہ روش تقلیدی
ترڑی رسم رسوم
وُٹھڑے مینہ مہر دے

صدقے ہک دلڑی دانی دے
کل افلاک نجوم
کیا طبقے عنصر دے

برکت بحر علوم حقائق
تھئے واضح مفہوم
سر اسرار دہر دے

ہر موجودوں رمز وجودی
کیتا شور ہجوم
وانگے روز حشر دے

جوگی جگت نبھاون پورا
ہے بے شک معدوم
وچ رہیں جگ ابتر دے