رات دنے میں تینوں ٹولھاں تیرے لئی
پیار دے سچے موتی رولاں تیرے لئی
آپنے سبھے سُکھ میں لا کے تیرے ناں
دُکھاں وچ وی سُکھّ ٹٹولاں تیرے لئی
توں آویں تے پیاس بُجھاواں اکھیاں دی
دل دے سارے بُوہے کھولھاں تیرے لئی
زندہ رہن دا بل توں مینوں دسیا اے
کیوں نہ پھیر حیاتی رولاں تیرے لئی
توں ہوویں تے یاد رہوے نا آپنا آپ
تیرے باجھوں پھر میں ڈولاں تیرے لئی
لوک تے آپنی خاطر ٹولھن آپنا آپ
تے میں آپنا آپ ٹٹولاں تیرے لئی
بولن دی پھر جاچ نہ مینوں یاد رہوے
آغا مندا بول جے بولاں تیرے لئی
حوالہ: فکراں کد توں وڈیاں نے