مینوں چنگی اے تنہائی رہن دیو
میں ایہ وختاں نال کمائی رہن دیو
سچّ دا ساتھ نبھاؤنا جے رسوائی اے
میرے جوگی ایہ رسوائی رہن دیو
دھو نہیں سکدے جو زہناں دی تلخی نوں
اُنھاں دے نال صلح صفائی رہن دیو
لوڑ پوے گی اوہدی اک دن انھیرے وچ
سوچاں دے وچ کجھ رُشنائی رہن دیو
اُنھاں نے تاریخ اساڈی لکھنی اے
آؤن والیاں لئی دانائی رہن دیو
اوڑک ایسے مٹی ہیٹھاں جانا اے
ایس مٹی نال تے اشنائی رہن دیو
ٹُٹ نہیں سکنا گول کتارا ویلے دا
آغا جی ایہ زور ازمائی رہن دیو
حوالہ: فکراں کد توں وڈیاں نے